Qendra shqiptare e Veprimit ndaj Minave (AMAE) planifikon, monitoron dhe koordinon të gjitha aktivitetet e veprimit ndaj minave në përputhje me objektivat e Programit Shqiptar të Veprimit ndaj Minave. Në këtë kuadër rifreskohen rregullisht çdo vit plani dhe prioritetet e çminimit të cilat më pas aprovohen nga strukturat qeveritare në nivel lokal dhe kombëtar. Detyrat e pastrimit dhe të vëzhgimit më pas iu shpërndahen organizatave çminuese për të kryer operacionet e pastrimit në veri-lindje të vendit.

AMAE koordinon gjithashtu me partnerët zbatues të Programit Shqiptar të Veprimit ndaj Minave (për më tepër lexoni në seksionin "Komuniteti i Veprimit ndaj Minave") të gjitha aktivitetet e veprimit ndaj minave në vend.

AMAE siguron që të gjitha aktivitetet e veprimit ndaj minave në vend (duke përfshirë çminimin, edukimin e popullsisë ndaj rrezikut të minave dhe asistencën ndaj të aksidentuarve) të zbatohen në mënyrë të sigurtë dhe efikase në përputhje me Standartet Ndërkombëtare të Veprimit ndaj Minave si dhe me Standartet Teknike dhe të Sigurisë.
Për këtë qëllim me mbështetjen e PNUD, Komisionit Europian (KE) dhe asistencën e ITF u ngrit në zyrën rajonale të AMAE-së në veri-lindje të vendit, njesia e Menaxhimit të Cilësisë. Kjo njesi përbëhet nga tre operatorë të cilët monitorojnë çdo ditë operacionet e pastrimit si dhe vëzhgojnë nëse këto të fundit kryhen në përputhje me standartet ndërkombëtare dhe sipas detyrave të përcaktuara nga AMAE. Skuadra e Menaxhimit të Cilësisë mbas përfundimit të operacioneve të pastrimit dhe përpara dorëzimit të tokës së pastruar tek komuniteti kryen kontrollin përfundimtar të cilësisë sipas metodave të adaptuara nga standartet ndërkombëtare.
		Kryerja e Kontrollit të Cilësisë nga Qendra Shqiptare e Veprimit ndaj Minave

Gjithashtu AMAE me mbështetjen e Qendrës Ndërkombëtare të Çminimeve Humanitare në Gjenevë ka krijuar që në vitin 2002 sistemin e të dhënave të IMSMA-s. Në IMSMA regjistrohen të gjitha të dhënat e grumbulluara nga raportet e organizatave çminuese të cilat më pas pasqyrohen dhe në Sistemin Gjeografik të Informacionit (GIS). Nëpërmjet IMSMA-s, AMAE përgatit dosjet e detyrave për organizatat çminuese, dhe rifreskon hartat që pasqyrojnë zonat e minuara, mbledh informacion nga vëzhgimet e impaktit si dhe mbi numrin e të aksidentuarve nga minat/UXO, duke vlerësuar në këtë mënyrë më mirë nevojat dhe prioritetet e komunitetit si dhe bën një planifikim më efikas të projekteve të asistencës.

Ndërtimi i kapaciteteve lokale

PNUD ka mbështetur AMAE që nga viti 2002 nëpërmjet projektit "Mbështetje për Programin e Veprimit ndaj Minave" /Anglisht/ (pdf file, 30kB) në ndërtimin e kapaciteteve lokale të aftë të planifikojnë, koordinojnë dhe monitorojnë aktivitetet e veprimit ndaj minave në vend në përputhje me Strategjinë Kombëtare. Ky projekt, i cili është akoma në zbatim, është financuar kyesisht nga PNUD, Departamenti i Shtetit Amerikan përmes Fondit Ndërkombëtar të Besimit në Slloveni (ITF), Turqisë, Kanadasë, Republikës Çeke, KE, Suedisë dhe Departamentit për Zhvillim Ndërkombëtar (DfID), Shtabi I Pergjithshem Zviceran etj.

Për këtë qëllim PNUD ka mbëstetur vazhdimisht AMAE me këshilltarë teknikë të cilët kanë asistuar teknikisht programin në sfera të ndryshme të tij si: çminimi, monitorimi dhe koordinimi, asistenca për të aksidentuarit etj.