Kontaminimi me mina/municione të paplasura

Kufizimi i zonës së minuar në kufirin Shqipëri - Kosovë Rreziku nga minat dhe municionet e paplasura në veri-lindje të Shqipërisë rrjedh nga konflikti i Kosovës dhe përfshin 120 km vijë kufitare midis Shqipërisë dhe Kosovës (nga Shishtaveci deri në kufirin me Malin e Zi në veri) deri në 20 km brenda territorit shqiptar. Nga survejimi i bërë nga Forcat e Armatosura Shqiptare (FASH) në vitin 1999, u identifikuan 102 fusha të minuara dhe beteje që zënë një total prej 15,250,000 m2. Rreziku përfshin mina kundër personit, dhe anti-tank, municione të paplasura (UXO) dhe predha artilerie të hedhura nga NATO në kufirin Shqipëri/Kosovë. Një problem që e komplikon më tej situatën është se Shqipëria nuk disponon harta të këtyre fushave të minuara.

Impakti social-ekonomik

Rajoni i prekur nga minat në veri-lindje të Shqipërisë është një nga zonat më të varfra në vend me një papunësi rreth 30%. 39 fshatrat e prekur direkt nga kërcënimi i minave në të tre rrethet kryesore - Kukës, Has dhe Tropojë kanë hasur vështirësi të shumta si rezultat i pranisë së këtyre armëve vdekjeprurëse. Banorë nga të gjitha fshatrat e infektuara nga minat kanë pesuar aksidente të ndryshme me minat e si rrjedhojë iu është kufizuar lëvizja dhe iu ofrohen një numër i vogël shërbimesh sociale. Rajoni i Kukësit mbeshtetet mjaft tek bujqësia dhe si pasojë e rrezikut të minave, afërsisht 25,500 e banorëve nuk mund ta përdorin tokën duke e shtuar në këtë mënyrë më shumë varfërinë në rajon. Aktivitetet kryesore të banorëve janë bujqësia, blegtoria, mbledhja e druve të zjarrit e aktivitete të tjera për të mbijetuar. Impakti i kontaminimit në mjedis gjithashtu nuk duhet nënvlerësuar. Kufiri midis Shqipërisë dhe Kosovës, zonë e favorshme për zhvillimin e turizmit nuk mund të shfrytëzohet për shkak të kontaminimit me mina dhe municione të paplasura.

Pasojë tjetër e zonave të minuara është dhe patrullimi me vështirësi i kufirit midis Shqipërisë/Kosovës. Që nga fundi i krizës së Kosovës, 13 policë janë plagosur nga minat dhe municionet e paplasura në përpjekje për të kryer detyrën. Kjo përbën në të njëjtën kohë dhe nje pikë të dobët në menaxhimin e integruar të kufirit në Europën JugLindore.

Lidhje me hartën e kontaminimit:
masa e vogël	masa origjinale
(400x513pixels, 32kB)	(1026x1317pixels, 146kB)