Strategjia Kombëtare e Veprimit ndaj Minave e formuluar në Qershor 2002 dhe e rishikuar në Gusht 2008 ka përcaktuar vizionin, misionin, prioritetet dhe Planin Kombëtar për Veprimin ndaj Minave. Struktura e rishikuar e Planit Kombëtar të Veprimit ndaj Minave është:

Vizioni - Shqipëria e lirë nga minat në gusht të vitit 2010,në përputhje me detyrimet e traktatit të ndalimit të minave kundër personit si dhe e lirë nga rreziku i municioneve te paplasura ku: (a) njerëzit mund të jetojnë e punojnë në një ambient të sigurtë e të parrezikuar nga keto armë vdekjeprurëse; (b) të demtuarit nga minat dhe nga municionet e paplasura reintegrohen në komunitet dhe (c) kufiri kontrollohet pa praninë e rrezikut të minave tokësore dhe municioneve.

Misioni - Hartimi dhe zbatimi i një programi të qëndrueshëm të Veprimit ndaj Minave me qëllim eleminimin e pasojave të minave dhe municioneve të paplasura, nëpërmjet operacioneve të pastrimit të zonave të minuara në veri-lindje të Shqipërisë deri në fund të vitit 2009.