Qeveria Shqiptare konfirmoi angazhimin e saj në adresimin e problemit të minave në vend me firmosjen (8 shtator 1998) dhe me ratifikimin (29 shkurt 2000) e Traktatit të Otavës dhe të Protokollit të II të Konventës mbi disa Armë Konvencionale (CCW). Të gjitha stoqet e minave kundër personit u shkatërruan në prill 2002, dy vite përpara afatit. Gjithashtu në fund të vitit 1999 Qeveria Shqiptare vendosi të adaptonte Standartet Ndërkombëtare të Veprimit ndaj Minave dhe të ngrinte strukturat zbatuese të veprimit humanitar ndaj minave.

Me synimin për të koordinuar në mënyrë adekuate veprimin ndaj minave, u formua në tetor 1999, Komiteti Shqiptar i Veprimit ndaj Minave (AMAC) - strukturë ndër-ministrore. Ky organizëm është struktura politikë bërëse e veprimit ndaj minave. Zëvendës Ministri i Mbrojtjes drejton këtë komitetet, i cili përbëhet nga anëtarë nga Ministri të ndryshme si Ministria e Mjedisit, e Brendëshme, e Shëndetësisë, e Punëve të Jashtme, e Financës dhe e Ekonomisë si dhe PNUD, UNICEF, ICRC si dhe në cilësinë e vëzhguesve marrin pjesë donatorë të ndryshëm.

Detyrat dhe përgjegjësitë e AMAC janë si më poshtë:

• Sigurimi i fokusit kombëtar të veprimit ndaj minave.
• Kërkimi i donatorëve dhe asistencës në mbështetje të programit të çminimit.
• Ti japë prioritete përpjekjeve të pastrimit të zonave të ndotura në Shqipëri.
• Të sensibilizojë komunitetin ndërkombëtar mbi kërcënimin e rrezikut të minave në Shqipëri.

Në të njëjtën kohë, një strukturë operacionale - Qendra Shqiptare e Veprimit ndaj Minave (AMAE) - u ngrit për të zbatuar programin e veprimit ndaj minave nën drejtimin e AMAC. Funksionet e kësaj strukture janë:
Krijimi dhe përpunimi i programit të veprimit ndaj minave. Koordinimi, kontrolli dhe monitorimi i aktiviteteve të veprimit ndaj minave në përputhje me prioritetet e AMAC. Akreditimi, miratimi dhe menaxhimi i cilësisë i aktiviteteve të veprimit ndaj minave. Grumbullimi, shqyrtimi, mirëmbajtja dhe shpërndarja e të dhënave dhe statistikave mbi minat dhe municionet e paplasura (UXO). Monitorimi dhe raportimi mbi progresin e çminimit. Vëzhgimi dhe vijëzimi i zonave të kontaminuara. Krijimi dhe përpunimi i procedurave të veprimit ndaj minave bazuar në standartet e Kombeve të Bashkuara. Hetimi shqyrtimi i të gjithë aksidenteve/incidenteve lidhur me minat. Koordimin me strukturat të tjera të veprimit ndaj minave.

Projekti i ndërtimit të kapaciteteve të PNUD i nisur në prill 2002 është duke asistuar:

• AMAC në formulimin dhe rishikimin e strategjisë kombëtare të veprimit ndaj minave, planit të punës dhe prioriteteve.
• Ndërtimin e kapacitetit të AMAE-së në grumbullimin, përpunimin dhe shpërndarjen e informacionit të veprimit ndaj minave.
• AMAE koordinon dhe kontrollon të gjitha aktivitetet e veprimit ndaj minave.