Mbledhja e AMAC		Zv. Ministri i Mbrojtjes Z. Petrit Karabina gjatë takimit me donatorët

Më 14 dhjetor 2006 u mbajt mbledhja e Komitetit Shqiptar të Veprimit ndaj Minave (AMAC), në Qendrën Kulturore të Forcave të Armatosura.

Ky komitet drejtohet nga Zëvendës Ministri i Mbrojtjes dhe përbëhet nga anëtarë nga Ministria e Mbrojtjes, Ministria e Punëve të Jashtme, Ministria e Ekonomisë, Ministria e Financës, Ministria e Punës, Çështjeve Sociale dhe Shanseve të Barabarta dhe Ministria e Arsimit dhe Shkencës dhe Ministria e Brendëshme. Organizatat kryesore ndërkombëtare të pranishme në vendin tonë si: PNUD, Komisioni Europian, UNICEF, ICRC, Fondi Ndërkombëtar i Besimit në Slloveni (ITF) dhe përfaqësues nga Ambasada të ndryshme në Tiranë, si dhe donatorët e programit të veprimit ndaj minave nga SHBA, Gjermania, Britania e Madhe, Republika Çeke dhe Franca marrin pjesë në këtë organizatë në statusin e vëzhguesit.

Mbledhja u drejtua nga Zv. Ministri i Mbrojtjes, Z. Petrit Karabina, i cili është në të njëjtën kohë dhe Kryetar i Komitetit Shqiptar të Veprimit ndaj Minave. Në mbledhje ishin të pranishëm anëtarë të AMAC, përfaqësues nga Ministri të ndryshme, Zëvendës Përfaqësuesja e Përhershme e PNUD në Shqipëri si dhe përfaqësues të UNICEF, Ambasadës së SHBA-së, Ambasadës së Britanisë së Madhe dhe nga Ambasada të tjera si Republika Çeke, Franca, Bullgaria, Rumania dhe Kina. Në takim ishin gjithashtu të pranishëm përfaqësues nga NATO në Tiranë si dhe përfaqësues të kompanisë së çminimit nga DCA.

Strukturat kryesore të programit u krijuan në vitin 1999: Komiteti Shqiptar i Veprimit ndaj Minave është struktura politikë bërëse e Veprimit ndaj Minave dhe e Qendrës Shqiptare të Veprimit ndaj Minave (AMAE), e cila koordinon dhe monitoron veprimin ndaj minave në vend. Afërsisht 13 milion m2 e sipërfaqes së kontaminuar në veri-lindje të Shqipërisë është pastruar nga minat dhe municionet e paplasura. Më tepër se 11 040 mina kundër personit dhe 4 492 municione të paplasura janë gjetur dhe azgjesuar nga kompanitë e çminimit. Numri i të plagosurve nga 155 në vitin 1999 është ulur në 2 në vitin 2005 dhe nuk është rregjistruar asnjë aksident për vitin 2006. Afërsisht 100 persona të gjymtuar nga minat janë rehabilituar fizikisht në vend dhe jashtë, ndërsa 67 të dëmtuar të tjerë janë asistuar përmes programeve të reintegrimit social dhe ekonomik dhe 30 të tjerë kanë marrë pjesë në trajnime profesionale. Objektivi kryesor i Programit të Veprimit ndaj Minave është pastrimi i të gjitha zonave të kontaminuara brenda territorit shqiptar në vitin 2010, në përputhje dhe me detyrimet e Konventës së Otavës. Të gjitha këto arritje u nënvizuan në fjalën e mbajtur nga Z. Karabina, Kryetar i AMAC, i cili falenderoi gjithashtu në mënyrë të veçantë Komunitetin Donator për mbështetjen dhënë programit.

Në fjalimin e tij ai vlerësoi dhe rolin e Qeverisë Shqiptare në përmbushjen e detyrimeve të programit.

Vijuan më pas prezantimet e specialistëve të AMAE-së mbi arritjet e secilit prej komponentëve të Veprimit ndaj Minave në Shqipëri. Përfaqësuesit nga Ministri të ndryshme, anëtarë të AMAC shkëmbyen eksperiencën e tyre të punës dhe theksuan mbështetjen e tyre kundrejt programit. Iu bë e ditur të pranishmëve se Ministria e Shëndetësisë në bashkëpunim me Ministrinë e Mbrojtjes kanë planifikuar në buxhetin e tyre një vlerë prej $250.000 për ndërtimin e Qendrës së Re të Orto-Protezimit pranë Spitalit Ushtarak.

Progresi i bërë deri tani u vlerësua shumë nga përfaqësuesit e ambasadave të huaja në Shqipëri, duke shprehur angazhimin e tyre për asistencë të mëtejshme për programin.

Në fjalën e mbylljes Zv. Ministri i Mbrojtjes Z. Karabina shprehu konsideratën e tij të lartë për asistencën e dhënë nga Komuniteti Ndërkombëtar, në mënyrë të veçantë ai falenderoi Departamentin Amerikan të Shtetit, Komisionin Europian, Gjermaninë, Zvicrën, Hollandën, Francën, Norvegjinë, Britaninë e Madhe, Kanadanë, Republikën Çeke dhe Turqinë.